2

Introduksjon til verksemda og hovudtal

Introduksjon til verksemda og hovudtal

Sokkeldirektoratet (tidlegare Oljedirektoratet) er eit statleg fagdirektorat som blei oppretta i 1972. Direktoratet er eit ordinært statleg forvaltningsorgan og er underlagt Energidepartementet.

Verksemda og samfunnsoppdraget

Hovudmålet til direktoratet er å bidra til størst moglege verdiar for samfunnet frå olje- og gassverksemda på norsk kontinentalsokkel. Dette skal gjerast gjennom ei effektiv og forsvarleg ressursforvaltning, der det blir teke omsyn til helse, miljø, tryggleik, utslepp av klimagassar og andre brukarar av havet.

Direktoratet skal vidare bidra til forvaltninga av CO2-lagringspotensialet på kontinentalsokkelen for å leggje til rette for reduserte utslepp av klimagassar og forvaltninga av norske havbotnmineralressursar.

Fagleg rolle i forvaltninga av sokkelen

Sokkeldirektoratet har ei sentral rolle i forvaltninga av olje- og gassressursane på norsk kontinentalsokkel og er eit viktig rådgivande organ for Energidepartementet. I petroleumsverksemda blir det tatt mange avgjerder som får store konsekvensar for samfunnet.

For å forvalte ressursane godt og sikre vidare verdiskaping, er det viktig å ha ei effektiv og føreseieleg forvaltning som har kompetanse til både å forstå og kunne utfordre avgjerder som blir tatt i verksemda. I norsk olje- og gassforvaltning er det Sokkeldirektoratet som i første rekkje har den nødvendige petroleumsfaglege kunnskapen.

Hovudoppgåver i petroleums- og sokkelforvaltninga

Hovudoppgåvene til Sokkeldirektoratet er å

• vere fagetat for arbeidet med forvaltninga av petroleumsressursar på kontinentalsokkelen og gi faglege råd i samband med vurdering, undersøking og utvinning av desse
• vere pådrivar for å realisere mest mogleg av ressurspotensialet innanfor olje og gass for på den måten å skape størst moglege verdiar for samfunnet
• bidra til forsvarleg utvinning av norske petroleumsressursar
• utøve forvaltningsstyresmakt i samband med tildeling av areal, leiting etter og utvinning av petroleumsførekomstar på kontinentalsokkelen
• gi faglege råd om vidareutvikling av reglar og rammer for ressursforvaltning på norsk kontinentalsokkel, og på enkelte område ha styresmakt til å fastsette forskrifter og gjere vedtak i samsvar med regelverk for petroleumsverksemda
• ha nasjonalt ansvar for data frå kontinentalsokkelen og ei oversikts- og formidlarrolle når det gjeld data, analysar og avgjerdsgrunnlag
• vere fagetat i samband med forvaltning av havbotnmineral
• gi faglege råd om lagring av CO2 på norsk kontinentalsokkel og innspel til Energidepartementet i samband med søknader om løyve etter CO2-lagringsforskrifta og planar for utbygging og drift av eit undersjøisk reservoar for injeksjon og lagring av CO2
• gi faglege råd når det gjeld forsvarleg bruk av areal på norsk kontinentalsokkel, og bidra til god sameksistens mellom ulike brukarar av havet
• føre tilsyn med målingar av mengd olje og gass som blir produsert frå norsk sokkel for å sikre at nøyaktige og pålitelege målingar ligg til grunn for berekning av skattane og avgiftene til staten, og inntektene til rettshavarane i petroleumsverksemda (fiskal kvantumsmåling)

Resultatkjeda – frå innsats til verdiar for samfunnet

Resultatkjeda nedanfor er ein modell som viser korleis direktoratet bruker innsatsfaktorane sine, via ei rekkje ulike aktivitetar, til å levere produkt og tenester som gir gevinstar hos eksterne brukarar og samfunnet. Modellen er ei forenkling, men gir likevel eit nyttig overblikk over korleis direktoratet arbeider for å realisere verdiar for samfunnet.

Figur 1: Resultatkjede i Sokkeldirektoratet

Organisasjon og leiing

Sokkeldirektoratet har hovudkontor i Stavanger og eit kontor i Harstad. Per 31.12.2025 var det 192 tilsette i Stavanger og 11 i Harstad. 

Sokkeldirektoratet blei omorganisert frå 1. april 2025, og har fire hovudområde, to stabseiningar, og fagnettverk med eigne fagleiarar på fem ulike fagfelt. Sjå meir informasjon om den nye organiseringa i kapittelet «Implementere ny organisering med styrkt leiarkapasitet».

Figur 2: Leiinga i Sokkeldirektoratet per 31.12.2025

Figur 3: Fagleiarar i Sokkeldirektoratet

Hovudtal

Utvikling i løyving

Figur 4: Utvikling i løyving

Sokkeldirektoratet får løyvingane sine over statsbudsjettet, som er inndelt i kapittel og postar. Kapittel 1810 post 01 er driftsutgiftene til direktoratet, som i hovudsak består av lønnsutgifter, leige av lokale, IKT-driftsutgifter og andre driftsutgifter. Kapittel 1810 post 21 omfattar utgifter til særskilde, tidsavgrensa tiltak, mellom anna kartleggingstokt og digitaliseringsprosjekt. Kapittel 1810 post 23 gjeld oppdrags- og samarbeidsverksemd, mellom anna innanfor den internasjonale verksemda til direktoratet.

Auken i løyvinga på kapittel 1810 post 01 frå 2024 til 2025 har mellom anna samanheng med at det blei innført ei sektoravgift på petroleumsverksemda i 2025. Avgifta skal dekkje kostnader Sokkeldirektoratet har til digital infrastruktur og digitalisering, dataforvaltning og -deling, kunnskapsutvikling og -deling, oppbevaring og tilgjengeleggjering av geologisk prøvemateriale.

Auken på kapittel 1810 post 21 er knytt til at Sokkeldirektoratet fekk tildelt 150 mill. kroner til natur- og ressurskartlegging av havbotnmineral. Midla blei nytta til innkjøp av autonom undervassfarkost (AUV) til Universitetet i Bergen, oppgradert multistråle-ekkolodd til Universitetet i Tromsø, havstraumsmålarar til Havforskingsinstituttet, og gjennomføring av tre samarbeidstokt med akademia. 23 mill. kroner av løyvinga blir søkt overførte til 2026 for å gjennomføre tre kartleggingstokt med akademia, og for å gjere klar ny AUV for kartlegging i dei djupe havområda på sokkelen.

Utvikling i årsverk

Figur 5: Utvikling i årsverk

Direktoratet har ein svak auke i avtalte og utførte årsverk i dei siste tre åra, men har betydeleg færre årsverk enn før 2022. Dette er trass i at oppgåvemengda har auka i same periode. Årsaka er mellom anna effektiviseringsgevinstane frå digitaliseringsprogrammet som er gjennomført i perioden. 

Figur 6: Gjennomstrøyming 2015-2025

Gjennomstrøyming i 2025 er vesentleg redusert frå førre år. Fråtredingane kjem hovudsakleg av pensjoneringar.

Ressursbruk

Figur 7: Estimert ressursbruk fordelt på delmål 2022-2025 (del av total) (oppdatert versjon 4. juni 2026)

Figuren viser korleis ressursane er fordelte på delmåla i tildelingsbrevet. Han viser auka ressursbruk på delmåla forvalte, gjere tilgjengeleg og formidle data og analysar, og arealforvaltning, tildeling av attraktivt leiteareal og langsiktig tilgang på ressursar.

Det kan vere ulike forklaringar til denne endringa. Metoden for å berekne ressursbruk er endra i 2025. Medan tala for perioden 2022-2024 er estimat basert på  gjennomsnittsvurderingar ut frå område og arbeidsoppgåver, har vi no innført timeregistrering. 2025 var det første året med heilårleg timeregistrering. Det er derfor vanskeleg, og ikkje vurdert som føremålstenleg, å trekke konklusjonar om endringane frå 2024 til 2025.

Frå neste år har vi eit godt grunnlag for å samanlikna år for år. Data frå timeregistrering gir oss også eit godt grunnlag for bruk i planlegging og prioriteringar i verksemda.

Nøkkeltal for Sokkeldirektoratet

Tabell 1: Nøkkeltal for Sokkeldirektoratet 2018-2025

Oppdatert: 30.04.2026