Ny rettleiar for statusrapportar
15.03.2021 Ny forskrift for statusrapportar trådde i kraft 1. januar 2021, og no er revidert rettleiar for statusrapportane klar.
Se revidert rettleiar for statusrapportane (pdf).
Norsk sokkel blir stadig meir moden, og nye utvinningsløyve vil stadig oftare omfatte areal som har vore konsesjonsbelagt ein eller fleire gongar. I nokre tilfelle får selskap tildelt areal som allereie har vore grundig evaluert av tidlegare rettshavarar.
Dei siste åra har det vore fokus på om større grad av deling av ulike typar data frå norsk sokkel vil gi ei meir effektiv ressursforvaltning.
Offentleggjering av statusrapportar vil betre tilgang for selskap som vurderer å søke i område som har vore tildelt tidlegare. Dette vil sikre eit minimum av erfaringsoverføring frå tidlegare rettshavar til neste, samt gi innsikt om nyare data og studiar som ein som ny rettshavar kan vurdere å skaffe seg.
Frigjeving av statusrapportar er venta å ha ein effektiviseringsgevinst ved at nye rettshavarar kan gjere seg nytte av tidlegare arbeid for å unngå å duplisere tidlegare arbeid som ikkje fører til ny kunnskap.
På denne måten kan ein få meir kostnadseffektiv leiting, både gjennom auka idémangfald og konkurranse – samt gjennom redusert leiterisiko. Ein legg såleis til grunn ein samfunnsøkonomisk vinst ved å frigi statusrapportane.
Statusrapportane er underlagt teieplikt etter petroleumsforskrifta paragraf 85 fjerde ledd. Teieplikt for tolka data i statusrapportar fell bort frå det tidspunkt utvinningsløyvet blir gitt opp, fell bort, går ut eller området der data stammer frå blir levert tilbake. Statusrapportane blir gjort tilgjengeleg på ODs Faktasider.
Forskriftsendringa trådde i kraft 1. januar 2021. Eit overgangsvedtak for forskriftsendringa gir høve til rettshavarar å, innan seks månadar (det vil seie 1. juli 2021), be om at dei delane av rapporten som inneheld tolka data innsendt før forskriftsendringa trådde i kraft, kan takast unna offentlegheita. Dette må då grunngjevast med konkret informasjon rundt konkurransemessige tilhøve relatert til hemmeleghald av desse.
Oppdatert: 16.03.2021